Dem boys seh…De Chronicle got Moses in tears Hot

It look like if de whole budget debate gun be pun de pension wha de Rat getting. Dem boys did expect this because when Shaatie announce how much money dem pensioners gun get he didn’t have to tell de country how much pension de Rat was getting.
He think people woulda forget and that dem wouldn’t seh anything. Well people start fuh compare how de budget give dem old people $13 a day while de Rat getting $100,000 a day, and he ain’t got to tun a straw.
APNU done seh that dem pensioner got to get $10,000 a month and AFC supporting dem. Is now dem boys understand wha de Waterfalls paper was talking about when it use to seh that some of de money people thiefing coulda go to help all dem old people and de poor people.
People thief so much that if that same money had to share wid dem old people dem same old people woulda get $50,000 a month.
But dem got other people who instead of talking bout de budget, talking bout who use to do wha and who didn’t do wha. People talk bout abortion. Dem got nuff pregnant people indeed. Irfaat is de one wid de biggest belly but dem don’t have no operating table fuh put he pun to perform any abortion.  Is a good thing Brazzy ain’t deh in Parliament.
And to think that irfaat telling de opposition fuh put de interest of Guyana first. He and he kavakamites use to put demself first, second and third. Dem use to put Guyana last. Thief man got problem wid everybody.
Is a shame. Uncle Donald shame suh till he decide that he gun lef de country while de debate going on. He shame how de Chronicle tun. Imagine dem calling Moses a child abuser when some of dem is rapist like a certain doctor. Some of de real child abuser use to wuk close to de Rat and dem wukking close to Uncle Donald. Moses did tek de paper from Uncle Adam fuh improve it. He now telling dem boys how he sorry because de same paper wha he help putting lash pun he.
Talk half and don’t think bout de other half.